പൊലീസിനെ കണ്ട് ഓടിയ ശീട്ടുകളി സംഘത്തിലെ രണ്ടുപേര്‍ കിണറ്റില്‍വീണു....

പെരുവള്ളൂര്‍ പഞ്ചായത്തിലെ പറമ്പില്‍പീടിക വരപ്പാറയില്‍ പൊലീസിനെ കണ്ട് വിരണ്ടോടിയ ശീട്ടുകളി സംഘത്തിലെ രണ്ടുപേര്‍ കിണറ്റില്‍വീണു. ആറുപേര്‍ പിടിയിലായി. വീണുപരിക്കേറ്റ രണ്ടുപേരും ആശുപത്രിയിലാണ്. ചൊവ്വാഴ്ച രാത്രി എട്ടരയോടെയാണ് സംഭവം. തേഞ്ഞിപ്പലം പൊലീസ് സ്റ്റേഷന്‍ പരിധിയിലാണ് സംഭവം. രഹസ്യ വിവരത്തെതുടര്‍ന്ന് ജില്ലാ പൊലീസ് സൂപ്രണ്ടിന്‍െറ നിര്‍ദേശാനുസരണം കരിപ്പൂര്‍ പൊലീസാണ് സ്ഥലത്ത് റെയ്ഡ് നടത്തിയത്. വരപ്പാറ അങ്ങാടിക്കടുത്ത് ശീട്ടുകളിയില്‍ ഏര്‍പ്പെട്ട സംഘം പൊലീസിനെ കണ്ട ഉടനെ ചിതറിയോടി. പിന്തുടര്‍ന്ന പൊലീസ് ആറുപേരെ പിടികൂടി. ഒരാള്‍ കിണറ്റില്‍ വീഴുന്നത് പൊലീസ് കണ്ടു. ഉടനെ നാട്ടുകാരുടെ സഹായത്തോടെ ഇയാളെ പുറത്തെത്തിച്ച് ആശുപത്രിയിലേക്ക് കൊണ്ടുപോയി. പിടിയിലായവരാണ് തങ്ങള്‍ക്കൊപ്പം മറ്റൊരാള്‍ കൂടിയുണ്ടായിരുന്നുവെന്ന് പൊലീസിനോട് പറഞ്ഞത്. തെരച്ചിലില്‍ ഇയാളെ മറ്റൊരു പൊട്ടകിണറ്റില്‍ കണ്ടെത്തി. രാത്രി പത്തുമണിയോടെ ഇയാളെയും കരക്കുകയറ്റി ആശുപത്രിയിലേക്ക് കൊണ്ടുപോയി. പറമ്പില്‍പീടിക സ്വദേശി അലിബാവയും(48) സൂപ്പര്‍ബസാര്‍ കാരിയോടത്ത് സെയ്തലവിയും(38) ആണ് കിണറ്റില്‍ വീണത്...