നിലമ്പൂര്‍: എതിരെവന്ന കാറിന് സൈഡ് കൊടുക്കുന്നതിനിടെ, റോഡരികില്‍ വീണ് കിടന്നിരുന്ന മരത്തടി കെ.എസ്.ആര്‍.ടി.സി ബസില്‍ തുളച്ചുകയറി സ്ത്രീക്കും ബാലികക്കും പരിക്കേറ്റു.
വഴിക്കടവ് കമ്പളക്കല്ലിലെ പൈക്കണ്ണൂര്‍ സീനത്തിനും (32) 11കാരിക്കുമാണ് പരിക്ക്. നാടുകാണി ചുരത്തില്‍ തേന്‍പാറക്ക് സമീപം വെറ്റിലക്കൊല്ലിയില്‍ ഞായറാഴ്ച രാത്രി ഏഴരയോടെയാണ് അപകടം.
ഗുഡല്ലൂരില്‍നിന്ന് പെരിന്തല്‍മണ്ണയിലേക്ക് വരികയായിരുന്ന കെ.എസ്.ആര്‍.ടി.സി ബസാണ് അപകടത്തില്‍പെട്ടത്. മരത്തടി ബസിന്‍െറ മുന്‍വശത്തുകൂടി തുളഞ്ഞ് കയറിയാണ് സ്ത്രീക്കും ബാലികക്കും പരിക്കേറ്റത്. സ്ത്രീയുടെ മുഖത്തും ബാലികയുടെ കാലിനുമാണ് പരിക്ക്. ഇവര്‍ എടക്കരയിലെ സ്വകാര്യാശുപത്രിയില്‍ ചികിത്സതേടി. അപകടത്തിനുശേഷം ചുരത്തില്‍ അര മണിക്കൂറോളം ബസ് നിര്‍ത്തിയിട്ടു. ഇതോടെ ബസിലെ യാത്രക്കാര്‍ വലഞ്ഞു.
കാട്ടാന വിഹരിക്കുന്ന വനമായതിനാല്‍ ചില യാത്രക്കാര്‍ മറ്റു ചെറിയ വാഹനങ്ങളിലായി ചുരമിറങ്ങി. വിവരമറിഞ്ഞ് ആനമറിയില്‍നിന്ന് നാട്ടുകാരും വനപാലകരും വഴിക്കടവ് പൊലീസുമെത്തി തുളച്ചുകയറിയ മരം നീക്കം ചെയ്ത് ഇതേ ബസില്‍തന്നെ യാത്രക്കാരെ ആനമറിയിലെത്തിച്ചു. പിന്നീട് ബത്തേരിയില്‍നിന്ന് വരികയായിരുന്ന മറ്റൊരു കെ.എസ്.ആര്‍.ടി.സി ബസില്‍ കയറ്റിവിട്ടു.
No comments:
Post a Comment