മുസഫയില്‍ ഞായറാഴ്ച വൈകീട്ടുണ്ടായ വാഹനാപകടത്തില്‍ രണ്ട് മലയാളികള്‍ മരിച്ചു. മലപ്പുറം മഞ്ചേരിക്കടുത്ത പയ്യനാട് സ്വദേശി പരേതനായ പിനാക്കോട് കൊല്ലേരി അലവിയുടെ മകന്‍ മുഹമ്മദ് ശരീഫ് (32), കരുവാരകുണ്ടിനടുത്ത ഇരിങ്ങാട്ടയിലെപരേതനായ ആമക്കുഴിയില്‍ മുഹമ്മദിന്റെ മകന്‍ ഹംസ (32) എന്നിവരാണ് മരിച്ചത്. നിലമ്പൂര്‍ കാളികാവ് സ്വദേശി അനീസിന് പരിക്കേറ്റു.
വൈകീട്ട് അഞ്ചോടെ മുസഫ കാരിഫോറിനടുത്താണ് അപകടം. അപകടത്തില്‍പെട്ട മൂവരും ഗന്ധൂത്ത് കണ്‍സ്ട്രക്ഷന്‍ കമ്പനിയിലെ ഓഫിസ് ജീവനക്കാരാണ്. ഇവര്‍ സഞ്ചരിച്ച കാറിന് നേരെ അമിത വേഗത്തിലെത്തിയ പിക്കപ്പ് ഇടിക്കാതിരിക്കാന്‍ ശ്രമിക്കുന്നതിനിടെയാണ് അപകടം സംഭവിച്ചതെന്ന് പറയുന്നു. പെട്ടെന്ന് ബ്രേക്കിട്ടതോടെ കാര്‍ നിയന്ത്രണം വിട്ട് പല തവണ മറിഞ്ഞതായി ദൃക്‌സാക്ഷികള്‍ പറഞ്ഞു. മൂവരും അബൂദബി ഇന്ത്യന്‍ ഇസ്‌ലാമിക് സെന്ററിന്റെയും കെ.എം.സി.സിയുടെയും സജീവ പ്രവര്‍ത്തകരാണ്.
ഖദീജയാണ് മുഹമ്മദ് ശരീഫിന്റെ മാതാവ്. ഭാര്യ: ഇല്‍മുന്നീസ. മക്കള്‍: നുബ്‌ല ശരീഫ്, ലുബ്‌ന ഷെറിന്‍, നുഫ്‌ല ശിഫ. സഹോദരങ്ങള്‍: മൊയ്തീന്‍, സഫിയ, റൈഹാനത്ത്.
ആബിദയാണ് ഹംസയുടെ ഭാര്യ. മക്കള്‍: അമല്‍ ഇഹ്‌സാന്‍, ആദില്‍.
by madhyamam
No comments:
Post a Comment